Ang Facebook page nga “BBM Is My President 2022” nagpagawas ug TikTok video niadtong Pebrero 13 nga adunay bahin sa interbyu ni kanhi senador Juan Ponce Enrile. Matod sa kanhi senador, kinsa nagsilbi usab nga ministro sa depensa ni anhing diktador Ferdinand Marcos, gideklarar ang Martial Law aron mapugngan ang pagpalapad sa Communist Party of the Philippines (CPP). Gipasabot usab ni Enrile nga kung wala pa madeklarar ang Martial Law niadto, si Jose Maria Sison, nga nagtukod sa CPP, mahimo na nga manguna sa nasud.
ANG PANGANGKON: Ang Martial Law nagluwas sa Pilipinas gikan sa komunismo, matod ni kanhi Sen. Juan Ponce Enrile
KATEGORYA: Bakak
ANG KAMATUORAN:
Sumala sa “Martial Law in the Philippines: The Methods of Regime Survival,” huyang gihapon ang nagkalapad nga CPP ug ang bag-ong natukod nga New People’s Army (NPA) sa dihang gideklarar ni kanhi Presidente Marcos ang Martial Law niadtong 1972. Gitataw sa mga akademiko nga bisan og ang tuyo sa Martial Law mao ang pagpugong sa pagkuyanap sa “communist rebellion,” ang kanhi diktador si Ferdinand Marcos Sr., nigamit niini isip pasangil aron malugwayan ang iyang termino. Niadtong 1972, tunga na si Marcos sa iyang ikaduha - ug katapusang upat ka tuig nga termino - nga gitakda sa Konstitusyon niadtong panahona.
Ang rebelyon sa komunista, nisaka pa ang gidaghanon sa mga NPA gikan sa 60 niadtong dekada 1970 ngadto sa 25,000 dihang natapos ang Martial Law. Sumala sa mga kritiko, ang nagkagrabe nga kahimtang sa sosyo-ekonomiko sa nasud, ug ang kakulang sa pagrespeto sa tawhanong katungod maoy pipila sa mga rason ngano nga midaghan ang mga tigpaluyo sa NPA kaniadto. Tungod niini, ang namatay nga diktador gitawag pa nga "NPA’s best recruiter”.
Ang pamahayag nga gipakita sa video gikan sa chief enforcer sa Martial Law, kinsa miangkon usab nga nagpakaaron-ingnon nga gi-ambush aron basulon ang NPA ug magsilbi nga fuse sa pagdeklara sa Martial Law. Ang “BBM Is My President 2022” Facebook page migamit sa maong video aron hatagag rason ang Martial Law, bisan pa sa kaylap nga paglapas sa tawhanong katungod nga natala niadtong panahona. Ang maong video dunay 1,900 views ug 224 reactions.
Kini nga artikulo gihubad sa bisaya sa Mindanao Gold Star Daily gikan sa fact check ni Maez Estrada at Joseph Gloria sa Altermidya ug gipatik kini ni adtong Marso 21 karon tuiga.
(The Mindanao Gold Star Daily is part of the more than 100 organizations online initiative from media, coalitions, civil society, business, academe, law, and the religious sector called ‘#FactsFirstPH.’ The initiative aims to collectively push for truth-telling and debunking lies through four steps: fact-checking by news organizations; networking by civil society and grassroots groups; research and analysis by academic institutions; and seeking accountability by lawyers’ groups.)
